Para disa ditësh, tek shkoja me taksi në punë, dëgjova nga radioja një lajm të jashtëzakonshëm, për një zbulim të ri sensacional, që i jep mundësinë gjysmës mashkullore të planetit, të shpëtojë një herë e mirë nga grindjet e zakonshme dhe të përnatshme të krevatit bashkëshortor, sëmundje e vjetër kjo, sa bota, qyshkur Adami vendosi t’i kalojë netët e tij në të njejtin krevat me Evën.
Zbulimin e bëri një koreanojugor (fatkeqësisht, nuk ia mbajta mend emrin këtij bamirësi të pashoq të racës mashkullore), që gjeti një mënyrë të shkëlqyer t’i shpëtojë kësaj gangrene: grindjes së krevatit.
Koreanojugori në fjalë, u martua me… jastëkun e tij.
Pasi vizatoi në faqen e jastëkut fytyrën e gruas që dashuronte, e mori atë për krahu (domethënë jastëkun) dhe shkoi në kishë, ku zhvilloi ceremoninë e tij të martesës me këtë jastëk. Menjëherë, çifti bashkëshortor, ai dhe jastëku, u tërhoq në banesën ku do të jetonin, u mbyllën në dhomën e tyre të gjumit, shijuan krevatin e ri bashkëshortor faqe më faqe dhe… Ç’ta zgjas, edhe sot e kësaj dite jetojnë dashurinë e tyre në paqe të plotë, madje pa nevojën e fjalëve. Sensacionalja: nusja nuk e ka hapur gojën asnjëherë, nuk ka kërkuar asgjë, nuk ka ndjerë kurrë deri më tani nevojën jetike të grave për një çikë… grindje. Edhe bashkëshorti fluturon në qiellin e shtatë të lumturisë: ka faqe më faqe një grua të pagojë dhe, ç’është më e rëndësishmja, e ka dashurinë në dorën e tij: e përdor kur dhe sa të dojë.
GRIGOR JOVANI
Δεν υπάρχουν σχόλια:
Δημοσίευση σχολίου